2Jo | MEK | STEP |

2 Ioane Ioane Ega Malele Gua Auga

2 John

1 Lau iifi e'a au akaiki'au aga'o malele i'ina lapapua, oi iifi e'a, ke iifi e'a papiaumi ^{▼▼1 Grik malagai, ‘Oi papie ke gaumu fou’} Deo ekinanimi aumi eemiai laulaisa. Oi Deo ega iifa ko'a auga opako'ania kainai, lau alou ko'agai animi laani alogaina. Ke lau ifou mo laa'i kai, papiau Deo ega iifa ko'a kelogo au'i ma'oai alo'i ko'agai animi keani alogaina. 2 Gome lai alomaisai Deo ega iifa ko'a auga ekaega, ke ega'ina iifaga eemaisai ageka aoniamo.

3 Deo ega iifa ko'a auga i'a apako'ania, ke isa i'a ani'a eani alogaina. Ega puo lau Deo Ama, ke Deo Gauga Iesu Kristo fou lamegamega peni'i, ega koa e'i gafegafe akaiki'a, e'i guani, ke e'i gagao fou i'a a'a aagu alogai fekepeni'a, faagu felo laoma.

4 Lau alou egama alogaina. Gome oi iifi e'a papiaumi isami aumi, Deo ega iifa ko'a auga kainai oague auga laisa. Ke oi ega koa okapa auga, Deo Ama kapa'ina eifania fakapa eoma auga i'opoga mo okapa. 5 Kai pau oi iifi e'a papiaumi animi laani alogaina aumi ^{▼▼5 Grik malagai, 'papie animu laani alogaina aumu'} eemiai Deo ega iifa kapula mamaga alaulaisa kai, Kristiano amia mo mamagai Deo ega iifa kapula aafiia auga eemiai laulaisa. Ke Deo ega iifa kapula ega'ina auga, i'a alo'a ko'agai aga'o aga'o ani'a faani eoma. 6 Ke alo'a ko'agai Deo, papiau fou ani'i faani auga laoga maina iina koa: Deo kapa'ina eifania fakapa eoma auga i'opoga mo fakapa. Ke oi Kristiano omia mo mamagai Deo oi epainimi alomi ko'agai aga'o aga'o animi foani eoma auga, ega'ina mo agugai foagu.

7 Lau ega'ina laifania, gome pau agofa'ai pamalele pifoge au'i ma'o kepealai kepinauga. Ke ega'ina papiau'i Iesu papiau aumauni imaaugai emai agofa'ai auga akepako'ania. Papiau iina koa i'opo'i au'i pifoge ipauma'i, ke Iesu ega ou au'i. 8 Maami fogoa fo'imaimi ega koa kapa'ina afipuguga opa'aua auga folopagea kai, afa fofouga foafia. 9 Kaisau Iesu Kristo epamalele koa aepamalele kai, laagai ifo ega pamalele eogeaua epamalele auga, Deo fou laa'i. Kai kaisau Iesu epamalele koa i'opoga mo epamalele auga, Deo Ama'a ke Gauga Iesu fou keagu. 10 Ke kaisau Iesu koa akepamalele au'i oi eemi akefai aisama, isa oi emi e'a fololaoaini'i, ke emi e'ai isafa foloifa koko'i. 11 Kai kaisau isa keifa koko'i au'i, isa isafa ega'ina papiau'i fou kai'ialao pamalele apala'i kekapa'i.

12 Lau nini'ani ma'o kekae faifani'i kai, anina alaani maleleai fapapua. Kai lau anina laani auga, kina aga'o faafai eemiai kua'a maa'a faisa kai fou fanini'ani, ega koa i'a ma'oaisai mo alo'a fegama alogaina laoma.

13 Deo oi aami akimi iifi e'a papiau'i ekinani'i inae lau fou aagu au'i ^{▼▼13 Grik malagai, ‘afakuami gauga au'i’} eemiai kepamego.